咩事會令公司立即喪失短期融資能力？
今日想同各位老闆分享其中一種會摧毀公司短期內融資能力的陷阱，就係『貸款查詢次序及次數』，申請貸款前謹記要小心行事。
唔少MC Advisors嘅客戶過往其實都曾經搵過其他顧問公司幫手，又或者曾經自己向銀行申請貸款，而最終因為申請唔成功，先至搵我哋幫手。
我哋接手後發現有唔少公司因為搵錯銀行，又或者搵錯Agent，最終令貸款批唔到，甚至在短期內 (2個月) 無辦法再度申請貸款，令資金鏈雪上加霜。
點解搵錯銀行會出事？唔係每間銀行都一樣？
🙅🏻♀️ 每間銀行當然唔一樣。
公司嘅營運情況、還款能力、股東TU評級、銷售額都會影響銀行批核貸款，由於每間銀行貸款批核條件都有唔同：
🔎 有啲著重還款能力
🔎 有啲著重負債比率
🔎 有啲著重股東信貸
因此貸款必須搵合適嘅銀行，先可以大幅增加成功機會。
如果你公司負債高，但偏偏搵左一間好睇你負債嘅銀行，試問銀行又點會批貸款畀你？
B銀行唔得我咪搵C囉，逐間逐間試到得為止？
唔少客戶都以為『呢間唔得就搵第間，問到得為止』，其實咁樣係⚠️大錯特錯⚠️。
短時間內向不同銀行查詢貸款，會令銀行認為你資金鏈出問題才急需大量借貸，試問銀行又點會借錢俾一間佢認為財政有問題嘅公司？
當A銀行見到你TU，你正在向B C D 三間銀行查詢各300萬貸款，就會非常影響A銀行對你嘅睇法，隨時唔批。而當你短期內有呢啲Enquiry record ，貸款難度就會幾何級上升，隨時令你短期內嘅貸款全部失敗。
所以做公司貸款必須一擊即中，如果唔係可能好麻煩。
如何用正確姿態向銀行借貸？
🧐企喺銀行角度諗，放貸係為咗賺息，絕對唔會為息而冒風險蝕埋個本。
所以對於還款能力弱的公司，銀行就好大機會將之拒諸門外 (例如現金流少、生意下跌中、負債高)。
『有錢洗乜借』係普通借貸人嘅諗法，但呢種諗法唔會令銀行覺得『你窮呀？唔緊要啦我照借俾你』。
銀行只會諗『我有錢我梗係借俾實力強嘅客戶，我驚你還唔起我更加唔會借俾你。』，銀行絕對唔係開善堂。
所以，做老闆一定要超前部署，你即使無法預知未來嘅能力，都必須判斷短時間內公司營運資金夠唔夠，生意會唔會唔好。如果預期短期內生意未必太好，或者未必太夠資金頂落去，就要盡早諗定對策，趁生意仲OK嘅時候同銀行伸手。
千祈唔好等到戶口乾晒塘，先搵銀行幫你，呢D時候神仙都難救。
(千祈唔好相信D不法分子幫你砌數借錢，出事架)
仲有呀，記得 #借定唔借，還得到先好借，量力而為呀。
註：
以上內容由©MC Advisors原創，版權所有，切勿抄襲及轉載。
🙇🏻♂️ 相關資訊謹屬撰稿人意見，如有紕漏，敬請包涵。
