近日金管局喺中小企融資方面推出咗九項措施，支持中小企頂住盤生意。
有客戶都即刻搵MC Advisors問對佢公司有咩影響，我哋今次就試下簡單解釋呢D措施到底係咩嚟。
措施一：
『不要求按時供款按揭客戶提前還款：協調機制銀行承諾，按照金管局2023年12月20日發出的指引，不會要求按時還款的按揭客戶提前還款。』
💁🏻♂️解釋：
呢項措施對於做貿易生意嘅客戶影響較大。做貿易生意嘅老闆通常都會擺物業落銀行去拎循環貸款(或者經八成擔保)，銀行每年會Review公司盤數，一般嚟講銀行見到公司生意變差，
喺嚴格計算風險後如果認為風險過高，就有可能喺review後收緊信用額。
以往即使公司準時還款，但只要銀行覺得你唔掂，就有機會『搞你』。
💡所以呢項措施十分簡潔，就係講緊只要準時還錢，銀行就唔準Call Loan。
措施二：
『調整信貸額度給予客戶最少6個月過渡期：銀行在定期檢視信貸額度時，會綜合考慮借款人的信貸需求、整體財務狀況及還款能力等因素，不會單純因為抵押品價值變化而調整額度。若因為客戶需求或風險狀況出現變化而需要調低額度，在客戶正常還款及沒有違反貸款條款的情況下，銀行會給予最少6個月時間，讓客戶逐步過渡至新信貸額度。』
💁🏻♂️解釋：
同上，措施主要影響循環貸款。
呢種措施一直都有，假設銀行收額，本身有$1500萬，銀行想收你$100萬，都會提早同你講，俾時間你準備，唔會今日同你講，聽日就收你@100萬。
至於日後會唔會放寬再畀多D時間客戶，就要睇銀行點處理喇。
措施三：
『加快處理八成和九成信貸擔保產品申請：財政司司長於《2024-25年度財政預算案》宣布，「中小企融資擔保計劃」下八成及九成擔保產品的申請期延長兩年至2026年3月底。銀行會配合香港按證保險有限公司積極檢視處理流程，務求加快貸款審批。』
💁🏻♂️解釋：
其實銀行批貸款速度好視乎唔同部門嘅工作量、個案數量、假期等因素，
呢D人為因素就比較難控制，制度上可唔可以要求佢哋加速，就要睇銀行執行力。
措施四：
『按「還息不還本」計劃原則支援有困難客戶：面對經營困難的中小企，銀行會以包容態度，按照審慎風險管理原則，提供適切的信貸支援，包括參照「還息不還本」計劃的安排，重組貸款，減輕客戶面對的資金壓力。針對已經在「還息不還本」計劃下過渡至部分本金還款的企業，銀行會按客戶要求，考慮延長部分還本選項期限，或讓有需要客戶選擇較低還本選項，甚或提供還息不還本安排。上述安排同樣適用於以個人名義敍做的的士、小巴及商用汽車貸款。』
💁🏻♂️解釋：
呢項措施係將個波交俾銀行，想銀行批還息不還本畀D還唔起本金嘅中小企，延續中小企壽命，還唔起都照俾你還住息先。其實都見到舊年百分百擔保開始要還本金後，好多中小企同時都承受住生意下跌加上還本金嘅雙重打擊，唔少公司真係還唔起而要執笠，呢種安排似乎係想逐D爆，😞好過一次過爆煲，畫面唔靚嘛。
措施五：
『提供更切合中小企需要的信貸產品和其他支援服務：銀行會利用金融科技，包括金管局推出的「商業數據通」（CDI），積極研究推出為中小企度身訂造的信貸產品，包括可快速批核的無抵押貸款。除了信貸產品外，銀行會提供其他服務支持中小企業務發展，例如跨境銀行服務、商業數碼服務、電子商貿應用以及環境、社會及管治（ESG）相關服務，協助中小企開拓業務領域和升級轉型。』
💁🏻♂️解釋：
呢個措施似乎需要D 時間睇下幾時會有具體方案，暫時聽落就未有…
嗱，我哋信會有㗎。
措施六：
『積極考慮利息和收費減免：銀行會提高中小企銀行服務收費的透明度，針對有需要的中小企客戶，銀行會考慮提供費用豁免、利息或其他優惠，減輕中小企的財務負擔。』
💁🏻♂️解釋：
其實現時都有銀行會提供政府擔保費回贈、豁免開戶費等等(當然唔係間間銀行都有)，有時我哋都會幫D客同銀行傾呢D位，減輕客戶貸款成本。所以如果有多D銀行可以有優惠，甚至多D優惠就更加好啦。至於利息減免，難度就高好多，因為銀行資金成本(Cost of fund)一直高企，只要Hibro唔跌，其實銀行畀平息嘅空間都有限。
措施七：
『設立一站式平台提供銀行中小企服務資訊：金管局會在網站設立中小企融資專頁，羅列不同銀行的中小企貸款資訊，包括服務專線、信貸產品種類等，方便中小企在銀行間作出比較及選擇。同時，金管局會推出中小企貸款專用電郵（smelending@hkma.gov.hk）及查詢熱線（2878 1199），收集和轉達中小企對銀行服務的意見。』
💁🏻♂️解釋：
即係成立一個新網站，一次過List晒所有銀行嘅電話同產品資訊。其實現時市面上嘅商業貸款資訊的確較混亂，整合一下都係好事。
Um…如果可以叫銀行Hotline請多D人等D電話易打D，就更加好喇。
措施八：
『便利客戶轉換貸款銀行：如中小企有意轉換貸款銀行，銀行承諾會盡力提供協助。原貸款銀行會透過金管局的「銀行同業帳戶數據共享」（IADS）計劃，在客戶同意下將其戶口資料轉交予新貸款銀行。此外，原貸款銀行承諾在7個工作天內，向客戶提供其現有信貸資料，讓客戶能提交予新貸款銀行，加快審批它們的開戶和貸款申請。至於以物業為抵押的貸款，除特殊情況外，原貸款銀行會爭取在收到相關法律指示6星期內解除抵押品的押記。』
💁🏻♂️解釋：
主要影響有需要將貸款轉去其他銀行嘅客戶，
通常都係畀銀行想收緊信用額嘅客
或者想提升信用額嘅客。
一般要將整筆循環貸款連物業搬去其他銀行
動輒需要3個月以上，
如果呢種機制可以加速，
的確可以幫中小企容易D渡過漫長申請期，
👍🏻絕對係好事。
措施九：
『銀行業界定期與商界組織會面了解中小企需要：香港銀行公會和香港中資銀行業協會會帶領銀行定期與商界組織和代表會面，了解中小企需要，以持續優化銀行服務，加強支援中小企。為此，香港銀行公會和香港中資銀行業協會將定期與金管局溝通工作的進度。』
💁🏻♂️解釋：
溝通好呀……係要溝通㗎……
綜合以上措施，其實見到金管局唔係無做野，尤其是幫助面臨Call Loan嘅中小企，亦想延續中小企生命，降低短期內中小企結業對市場嘅衝擊，有做點都好過無做。
😎你又覺得措施有冇用呢？
註：
🙇🏻♂️ 相關資訊謹屬個人意見，如有缺失，歡迎留言提點，敬請多多包涵。
