上次講完工程業（按此重溫），今次亦都講下餐飲業喺中小企融資層面，面對緊D乜困難，以及點樣應對。
餐飲業一定係近年其中一個生意最受影響嘅行業。初步統計過，23-24年搵我哋幫手融資嘅中小企入面，大約有15%就係餐飲業，上至連鎖餐廳，下至小型Cafe、外賣店、茶飲店等等。
今年餐飲業喺融資上面對緊幾個難題：
借咗太多百分百擔保
餐廳因為租金同人工成本高，好多餐廳有申請早幾年推出嘅百分百擔保計劃，而獲得『租金 + 薪金開支嘅27倍』大額貸款，但因為金額太大，實際上可能遠遠超越一般餐廳嘅負擔水平。
當生意額下跌，負債佔每年營業額嘅比例過高，就好大機會無辦法再做任何貸款。
餐飲業壞帳令銀行收緊貸款額
因為受生意下跌衝擊太大，餐飲業嘅壞帳比其他行業高，坊間唔少銀行對餐飲業十分謹慎，但凡見到餐廳有任何『唔掂』嘅徵兆，輕則減少貸款額，重則直接唔批，亦有銀行抱住『唔借就唔會輸』嘅諗法，直接將成個行業『宣佈死亡』，一律唔接餐飲業貸款申請 (🤐當然唔會開口話唔做，但就會將個案『冷處理』)。
受客流量、餐廳規模影響
現時銀行最入門嘅貸款方案就係政府九成擔保計劃，但要申請，必須要符合個別銀行對於生意規模嘅要求。
其實香港好多餐廳規模唔大，例如鋪面比較細嘅Cafe、外賣店、茶飲店，佢哋因為受鋪面大細、客量、人手嘅限制，好難有『靚仔』嘅營業額俾銀行見到，所以唔係咁容易說服銀行，你公司『有得做』或者『還得起』。
現金收入『消失』
餐廳一般嘅現金收入佔整體生意約3至6成，由於唔少餐廳都係現金出糧，現金找貨數，收返嚟嘅現金就會直接出糧找數，變相令呢筆現金收入『從來都無出現過喺銀行戶口』。
好處當然係方便同埋可能交少D稅，但需要融資貸款嘅時候，銀行就會低估咗你公司的營業額同財政實力，變相令銀行批少D貸款，甚至唔批貸款。
固定成本高、營運儲備不足
當一間營運資金不足嘅餐廳想借錢，通常都會出現以下情況：
公司：『我唔夠營運資金想借錢。』
銀行：『你唔夠錢我點知你還唔還得起?』
公司：『我有錢洗乜問你借?』
銀行：『我唔知你有冇錢還我點會想借俾你?』
營運餐廳嘅固定成本(fix cost) 非常高，一間中型餐廳每個月固定開支隨時超過50萬，一但嗰個月生意少左，但成本無變，公司嘅現金就好似倒水咁倒，幾個月就可以令公司營運資金唔見晒。
當營運資金唔夠，銀行就會質疑你嘅還款能力，呢個真係屬於有雞先定有蛋先嘅問題，但無奈銀行係有權決定借唔借嘅一方，所以當餐廳出現現金儲備太少嘅情況，銀行覺得餐廳還款能力不足，就唔會願意貸款，『唔借就唔會輸』，好過為左賺少少利息而輸埋個本。
睇到呢度，聰明嘅老闆可能已經知道，以上問題其實唔係咁容易可以解決，亦都解釋咗點解香港大部份餐廳都咁難做公司貸款。
如果你都面對緊以上困難，想睇下有冇辦法解決，不妨搵我哋問下。
註：
🙇🏻♂️ 以上資訊謹屬個人意見，如有缺失，敬請多多包涵。
